الرئيسية / الاخبار / رواية نوتيلا للكاتبه نور اسماعيل الحلقه الرابعه والعشرون

رواية نوتيلا للكاتبه نور اسماعيل الحلقه الرابعه والعشرون

الحلقه ٢٤

)شكر خاااص جدا ل ديشا
صاحب كلمات شعر الفصل ده )

كتالوج للموبيليا اوض نوم وانتريهات ،جايبهم عمرو عشان تتفرج عليهم
تبارك وتختار منهم ع ذوقها ..
لكن بسبب الى حصل ليها من آخر مرة شافت فيها صلاح وهى رجعت متلخبطه
ورجعت حيرانه ومش عارفه ترسى ع قرار ..

عمرو : ( بيفرجها) ايه رأيك ف دى كمان ؟
تبارك : ( بتوهان) اه كويسه

عمرو : مالك يا تبارك ؟ من ساعة م جيت وانتى سرحانه ومستغربك

تبارك : مستغربنى ازاى ؟
عمرو : يعنى ..مقابلتك ليا مختلفه ،مش بترحاب كل مرة ولا الابتسامة الحلوة بتاعتك
انتى فيه حاجه مضيقاكى ؟

تبارك : انا !! لأ

عمرو : كلمينى بصراحه عشان خاطرى ، بالله عليكى مالك
متقلقنيش الله يخليكى

تبارك : عمرو …انا مش عارفه اقولك ايه
خايفه اصارحك بحاجه تفهمنى غلط ،وخايفه اكتمها جوايا افضل معذبه نفسي
ومعذباك ويايا
مش عارفه اعمل ايه ( عيونها دمعوا )

عمرو ( بقلق) هى وصلت للدموع كمان ( بيطلع منظيله يمسح دموعها)
مالك ياحبيبتى بس فيه ايه

وقف ع باب اوضة الصالون سفيان وخبط الباب للاستئذان

سفيان: انا اسف بس كنت عايزك ياعمرو فكلمتين

عمرو انتبه لسفيان بس عقله مع تبارك

عمرو : خير ياسفيان تعالى

سفيان: طيب اسيبكم تكملوا كلامكم ولما تخلصوا هجيلك

عمرو : يا اخى تعالى فيه ايه

سفيان : خلاص بعد الاكل اقولك بقى

سابهم وخرج تانى

عمرو : ايه يا حبيبتى مالك ،حرام عليكى متقلقنيش كده

تبارك : ( بصوت معيط ) انت الى متعاملنيش بحب كده يا عمرو انا ماستهلش
حبك ده

عمرو : ليه بس حصل ايه لكل ده

تبارك فالوقت قررت تحكى كل حاجه لعمرو ،خلاص ده جوزها قدام ربنا
لازم يعرف ايه الى بيدور فدماغها والقلبان الى هى فيه ده سببه ايه
حست بالذنب ناحيته وناحية ربنا …حتى صلاح حست انها ظلمته
قررت كشف اوراقها لعمرو يمكن عنده الحل لكل الحيرة والتوهه الى هى فيها دى
ويمكن يكون عنده نهاية لاحساس الذنب الى طول الوقت ملازمها .

‘·,’·,’·,’·,’·,’·,’·,’·,’·,’·,’·

“مريم !”

مريم : تعالى ياسليم

داخل ومعاه كتب وورق

سليم : نفسيتك اتحسنت ؟

مريم : انت الى بتسأل نفسيتى اتحسنت ولالأ ؟ وانا الى المفروض مزعلاك منى

سليم : انتى مش مزعلانى منك ،انتى مزعلانى عليكى يا مريم
معرفش اعمل ايه تانى اوصلك بيه انك غالية عندنا اوى
والطريقة الى انتى ماشيه بيها فحياتك دى متنفعش
وتفكيرك كله غلط
عمى المشاعر والعواطف ده هيتعبك ويتعبنا معاكى

مريم: خلاص ياسليم ..انا بجد اتعلمت
ورحمة ماما المرة دى اتعلمت
وان شاءالله ربنا هيقوينى وهبقى اقوى وهبقى عند حسن ظنكم كلكم
عارفه انى تعبتكم معايا كلكم ،خالتو …وانس وانت !
والبنات
كلكم حاولتوا معايا كتير بس انا الى مكنتش بفهم
مكنتش بسمع غير لقلبي وبس …قلبي الى تعبنى وجابنى الارض

سليم : خلاص بقى ، امبارح عدى منفكرش فيه
خلينا فبكرة والى جاى
بصى انا فكرت ازاى تقدرى تملى الفراغ الى عندك ده
ف لاقيت فكرة اولهم
الكتب دى عن حياة الصحابة ايام رسول الله
وعن حياة رسولنا الكريم مع زوجاته
بطريقه سهله وحلوة
وكمان ده ورق اعلان عن كورسات شوفى انهى لغة تحبي تاخدى كورس
فيها وقوليلى وروحى قدمى انتى كده كده بدأتى اجازة والترم التانى لسه قدامه شهر
وكمان ده اشتراك فى جيم

مريم ( مبتسمه) وكمان چيم ! بس انا مش تخينه ياسليم

سليم: لا يا كلمش مش عشان تخينه ،الچيم ده عشان تخرجى الطاقه السلبيه
الى عندك
كل يوم تروحى ساعة ولا اتنين
تغيرى جو تلعبي رياضه
تكسبي معارف جديدة
تتحركى تتنشطى …الرياضة كويسه ومش وحشه

مريم : ميرسي ياسليم

سليم: انا متأكد ان لو يومك مشى مابين قراية الكتب وكمان صلاتك تحافظى عليها
لان الى يفكر فالانتحار يبقى بعد عن ربنا يا مريم …فهمانى

زائد الكورسات تدرسي حاجه بتحبيها تزودك خبره
والرياضه
يومك هيتملى مش هتحسي بفراغ
هتتغيرى للاحسن ان شاءالله

مريم قامت وهو بيتكلم حضنته اوى وهو ابتسم وحضنها

مريم: انت احسن اب فالدنيا ♡ الحنيه دى كلها كتير عليا
انت اكيد ربنا خلقك انسان عادى بس بقلب ملاگ

سليم حاضنها وباصص لعيونها ومبتسم

سليم: وانتى اكتر بنوتة كلموشه ممكن تكون غلبت ابوها فالدنيا

مريم: خليك معايا ياسليم ، خليك جنبي
بفكر لو فحياتى كمان اتحرمت من ابويا الحقيقي وكمان محرومه
من حنيتك انت ك أب كنت هبقى عاملة ازاى

سليم: بس انا جنبك ومعاكى وعمرى م هسيبك
بس يارب كلمش الصغنن الكلب يكون اتعلم من غلطاته
عشان خلااااص جبت اخرى معاها

مريم زقته فصدرة بطفوله وقامت

مريم: م خلاااص مبقاش كلمش صغنون
خلاص بقيت مريم كبيرة وعاقله وناضجه ( بتلف حوالين نفسها زى الاطفال)
كل ده وصغنن

بيبصلها بصة حنينه اوى مع ضحكته الحلوة ،فعلا كبرت وبقت اجمل
آنسه فالدنيا فعينه

مريم: انسى بقى البيبي الى جت زمان هنا دى ،من هنا ورايح فى تحمل مسؤليه
ناس حبتنى بجد وحطت ثقتها فيا
فى حد كلمته واحدة ومش هيغيرها
فى وعد بجد ياسليم

فتح سليم كف ايده ليها
سليم: وعد رجاله ؟!
مريم خبطت كبفها ع كفه وسلمت بقوة

مريم: وعد ظباط يا حضرة المقدم !!

ابتسموا الاتنين ولف ايده فايدها ولفها له وباسها فدماغها وقال…

سليم: حاولى تخلى لاولادى الجايين حب فقلبي ، انتى خدتى كل حاجه يا كلمش
ربنا يخليكى ويحميكى ليا لحد اليوم الى اتطمن عليكى بصحيح
اما تكونى فبيت جوزك …

#نوتيلا
#لنورإسماعيل

‘·,’·,’·,’·,’·,’·,’·,’·,’·,’·,’·

حاطط ايده ع عيونها وماشى بيها لقدام

احمد: متفتحييييش

لمى : حاضر اهو ،خايفه اقع يا احمد

احمد: لأ متخافيش انا معاكى ،هانت قربنا نوصل

كام خطوة وساب عيونها ،فتحت لاقت بلالين كتير ع مدخل العوامه
ومكتوب عليهم هابي بيرث داى .

كانت ماشية عالمارين لحد العوامه منبهرة بالى شايفه ،والى برة ميغنيش عن جوه
شموع كتيييير وبوفيه فيه كل م لذ وطاب.

لمى: ياعم ياعم الرومانسيه ،كل ده علشانى ؟!
واتعلمت كل الحجات دى امتى بقى ومن ورايا

احمد: انتى الى علمتينى ،علمتينى احبك ازاى
وعلمتينى ابقى رومانسي
وعلمتينى اسعدك مرة من المرات الكتير الى اسعدتينى فيها

لمى واقفه مبسوطةاوى ،هو راح للسى دى حط سى ديهايه اغنية رومانس
واخد ايدها ..

احمد: تسمحيلى نبدأ عيدك برقصة معايا

الفرحة الى كانت فيها لمى محدش كان زيها ساعتها ، وايديها الاتنين كان ماسكهم
وحاضنها وبيرقصوا الاتنين ع نغمات هادية
وسط الشموع والورد فجو هادى وحلو يساعد الحب يزيد اشتعال
ومفيش اى حاجه تعكر صفوهم ..

لمى: احمد ده اجمل عيد ميلاد عدى عليا

احمد: ولسه يا حبيبتي انتى مشوفتيش حاجه ،الليلة بتاعتك ولسه مخلصتش

خلصت الاغنية ،اشتغلت وراها اغنية تانى اجمل

اخدها وقربوا من البوفيه الى عليه التورتة والحاجات

ولع الشمعه

لمى : ليه حاطط شمعه واحدة ؟

احمد : عشان هنحسب عمرك من وقت م كنتى معايا ،عمرك الحقيقي انا ماليش دعوة بيه

لمى ابتسمت

احمد: استنى ! اتمنى امنيه الاول

لمى اتمنت فنفسها انه يكون معاها طول العمر ،وبعدها نفخوا مع بعض الشمعه

طلع من جيبه علبة صغيرة

احمد : كل سنة وانتى طيبه

لمى اخدت العلبة وهى مبسوطة بتفتحها وعيون احمد متابعاها تشوف رد الفعل

لما فتحت فوجئت ب قلب من الدهب معمول عليه صورتها !

لمى : واوووو تحفه ،جبتلى الصورة دى منين

احمد: انتى ناسية انى مصورك صور كتير فكل مرة بنخرج فيها

لمى : حلووة اوى ، ده دهب يااحمد

احمد: الغالى له الغالى …

لمى : بجد بجد جميلة وفرحتنى اوى اوى ( حضنته وباسته فخده ودى كانت اول مرة تعملها)
بحبك اوى اوى اوى

احمد : حاولت اسعدك بكل م اقدر زى م بتسعدينى دايما يالمى ،من يوم م دخلتى حياتى
وانا مبسوط وفرحان
وانا حاسس ان الى فات فعمرى رجع وبعيشه
كنت فاكر ان انضحك عليا كل السنين الى مرت دى
فجاة اتخرجت واتجوزت وخلفت ،فجاة مبقتش بفكر غير فالببت والشغل
والطلبات والمصروف والخضار والفاكهه
انتى خلتينى احب اليوم واحب حياتى
احب الناس
احس ان ليا قيمة وليا وجود
انتى كل حاجه فحياتى يالمى

حضنها اوووى وهى كمان ، وبعدين بصوا فعيون بعض بحب لثوانى
قرب احمد ل لمى
وهى قربت
يمكن المسافه بين عيونهم لبعض مكانتش كبيرة ،مفيش حواجز انهاردة ولا ناس
مفيش حاجه ممكن تمنعهم عن بعض
فوسط كل احاسيس الحب والمشاعر الدافيه دى ،اتقابلت عيونهم قصاد بعض وشفايفهم

لمى اول مرة حد يبوسها ، لكن تصرفها كان غريب مستغربتش ولا اتخضت ولا بعدت
احمد اتجرأ وباس شفايفها وهى كمان كانت بتبادله وكأنها مش اول مرة فحياتها !

كل سنين عمرهم هما الاتنين لو اتجمعت ع بعض مش هتكفى حلاوة اللحظة الى كانوا فيها
ع اد م هى بتحمل اصدق مشاعر جواهم
لكن معروفه ان اى لحظة شيطانيه محرمه … الشيطان بيحليها ع اد م يقدر عشان الانسان يرجعلها تانى ..

بعد البوسه ..

احمد رجع براسه يبص للمى وهى بصاله

لمى : اول مرة حد يبوسنى ..بس انت مش حد انت كل حاجه

احمد: انا عملت كده من غير وعى ، كان نفسي نقرب اكتر من بعض

لمى : خلينا فاللحظة الحلوة ( ضحكت وراحت للسى دي حطت اغنيه تفرفش)
تعالى نرقص سوا

رقصت واخدت ايده هو مش بيعرف بس هى كانت بتعلمه معاها ،هى تضحك ع حركاته الغلط
وهو يضحك بصوت عالى
وبعدين هو شغل اغنيه تانيه وقلدها بترقص ازاى وهى بتضحك ،شغلت هى اغنيه اجنبي
ورقصوا رقص غربي سوا
برضو مكانش بيعرف
لمى اخدت معاه اول اغنيه تعليميه وبعد كده عرف وبقى يبص ع حركة رجلها وجسمها ويقلدها
وبعدين الحنان اشتغل
جابوا مخدات الى جوه فالاوضه وخبطوا فبعض وبهدلوا بعض والمكان
وهما بيتنططوا ،دخلت هى الحمام لاقت معجون سنان وحلاقه وطلعت ترش عليه وبهدلته
وهو مسك منها يرش عليها وهى تهرب منه بضحك هيستيرى
وبعدين جابت البالالين بالونة بالونه تفرقعها وهو اتعدى من جنانها وبقى يفرقع معاها
مسكو الورد وقطعوه وبقوا يرشوا ع بعض اوراقه وهما برضو مش مبطلين ضحك

الوقت سرقهم لا عارفين الساعة كام ولا مين كلمهم ع الفونات صوت المزيكا عالى
قعدوا ياخدوا نفسهم عالكنبه

احمد : اااااااه يا مجنونة نفسي اتقطع

لمى : لما نبقى فبيتنا هجننك اكتر من كده اضعاااف

صوت المزيكا وقف بيبدل بين اغنيه والتانيه ،سمعوا فون احمد بيرن

احمد جرى جابه من جيب الچاكيت لاقاها مراته!!،طفى الاغانى وقال ل لمى لحظة متتكلمش

احمد: ألو ؟
اه
طب مالك فيه ايه
خلاص خلاص انا هجيب الدكتور وجاى
مسافة السكة ..سلام

اخد الچاكيت بتاعه ولبسه بسرعه وراح قدام لمرايا ينضف هدومه من الهبل الى كانوا بيعملوه

لمى : فيه ايه ؟!

احمد: بنتى بترجع وسخنه وبتتنفض جامد وهى مش عارفه تتصرف ،هاخد دكتور ورايح
معلش يا حبيبتى انا اسف غصب عنى والله

ده مفتاح العوامه بعد م تمشى اقفليها
متزعليش ( باس شفايفها اووى ) مشى

لمى واقفه بصاله وهو خارج بسرعة وسايبها هتطق من الغيظ

لمى : اااااه عمرى م هحس انه ليا لوحدى ،بوظتوا اليوم يارب تموتوا
مسكت قالب التورتة بغيظ وقلبته عالارض!

‘·,’·,’·,’·,’·,’·,’·,’·,’·,’·,’·

حسام : اقولك نكته ؟!

نشوى : بقولك ايه ركز فشغلك عشان عندى حجات كتيير مطلوبة منى ولسه هظبطها

حسام: طب اعمل ايه انتى مش فاكه خالص بقالك كام يوم
عايز افكك
غلطان!

نشوى: لا مش غلطان بس والله عايزة اعمل شغلى الى ورايا ،انت معندكش شغل

حسام: لا عندى بس برضو ميمنعش نستفتح اليوم بضحكتك الحلوة

نشوى : ايه نستفتح دى انت بتبيع لبن ؟!

حسام: ههههه اهو انتى الى قولتى نكته مش انا
مالك بجد فيكى حاجه متغيره

نشوى: بجد مفيش حاجه يابنى مالك

حسام: وحياة حس حس ؟

نشوى( ارتبكت) حس حس ايه انت اتهبلت تحلفنى بيك

حسام( مبتسم) وليه فاكرة انى بحلفك بيا انا بحلفك بقطتك مش انتى مسمياها حس حس
برضو

نشوى ( اتكسفت) احم ! ممم اه قطتى

حسام: هتخبي ع حس حس طيب

نشوى بصتله مبرئة

حسام: اه المرة دى عليا

نشوى(ضحكت ورجعت بصت للكبيوتر)

حسام: طب انا هقولك نكته ، فمرة واحدة قالت لواحد انت خاين وانا هسيبك
قالها ليه
قالتله انت بتكلم بنات غيرى
قالها لا محصلش
قالتله لا بتكلم بأمارة سارة ورودى ودينا الى عالفيس
قالها وانتى عرفتى منين
قالتله ماهو انا الى عامله الاكونتات دى
قالها يعنى كلهم انتى ! خلاص يبقى مبكلمش غيرك برضو

نشوى فعلا ممسكتش نفسها من الضحك ،حتى صوتها على وخبت بوقها بايدها
هو انبسط وقرب كرسيه لمكتبها

حسام: ايوة بقى ايوة بقى هو ده الكلام

نشوى بصاله اوى من غير سبب هو لاحظ

حسام: بتشبهى ولا ايه ؟

حبت تغطى ع سرحانها فيه بأى حجه

نشوى: حسام مبتفكرش تعمل نيولوك ،ايه كمية الشعر دى كلها
شعرك كبير وحواجبك تقيله
وعامل دوجلاس
كتير يا حسام كتيير

حسام: يعنى هو شعر وشى زاحم علينا المكتب ! ده انت بنى ادمه غريبه

ومعدتش الكلمة دى كمان نشوى وغرقت فكريزة ضحك

حسام: ايه الى اعمل نيولوك ! انتى ايش عرفك حبه الشعر الى مش عاجبينك دول
مخلينى مختلف

نشوى: اه ومجرجر البنات وراك انت هتقولى
حسام: بنات !!

نشوى: اه بنات ، بتنزل البوست بلايكاتهم ماشاء الله عليك
اكتر حد فالدنيا عنده فريندز بنات اكتر من الشباب وكل صورة
واو ايه الجمال ده يا حسام
تجنن يا سام
ايه الدلع الفاضى ده

حسام : يا متاااابع انت ،طب عبرينى بلايك حتى

نشوى: لا طبعا انت بتحلم

حسام: اومال بتراقبينى فى صمت ليه ؟ اوعى تكونى انتى رودى ودينا وسارة

نشوى : ههههههههههه

‘·,’·,’·,’·,’·,’·,’·,’·,’·,’·,’·

كل مرة بعد م يارا تاخد علاج الكيماوى ،كانت بتتعب اه لكن كان عندها قوة احتمال اكبر
بس المرة دى جسمها مكانش مستحمل لدرجة انها اتعذبت اوى
وعذبت ياسين معاها .
فحمام المستشفى ساندها وهى تعبانه اوى دى رابع مرة تحس بقئ من ساعة
م اخدت الكيماوى

يارا( بتعب) تعبتك يا ياسين اوى

ياسين: تعالى بس ارتاحى

سندها بالراحه لحد سريرها ،رفع رجليها ببطء وغطاها

يارا وهى بتنام لاقت خصلات من شعرها واقعه عالمخدة
بقالها فترة شعرها بيسقط من العلاج ، وبدأت فروة راسها تبان
يمكن ده الى عاملها حالة نفسيه سيئه
اى بنت جمالها فشعرها ،وبالذات يارا شعرها جميل جدا

من وقت شعرها م بدا يتساقط وهى بتبص لوشها فالمرايه ، بدا يبقى شاحب
واصفر
الملامح بدات ميبقاش لها حدود رسماها
الحواجب بتخف والرموش وقعت!

ياسين كان حاسس انها نفسيتها تعبانه بسبب كده ،اول مرة تتعرض لكده
حتى لو عارفه انها عندها كانسر وبتتعالج بالكيماوى
والعلاج هيوقع شعرها
لكن الحقيقة بتنكرها اى بنت مهما ان كانت …ان معالمها ك بنت تروح

ياسين : مرتاحه كده
يار: الحمدلله

ياسين : لو تعباكى حاجه قوليلى ،اتكلمى متسكتيش كده

يارا عيونها مدمعه وقامت من نومتها تلم خصلات شعرها الى واقعه وتحطهم
فكيس) مليان شعر

ياسين شايفها وفهم مالها مسك ايدها وخلاها تسيب الكيس وخضن بايديه الاتنين
كف ايدها وهو باصص لها

يارا: جيت ووسطكم ووسط حبكم وحنانكم نسيت انى بتعالج
نسيت انى جايه مستشفى بتعالج من مرض خطير
نسيت انى باخد ادوية توقع شعرى وتخفى ملامحى
بس مع اول شعرات وقعت وانا مش مصدقه …مش مصدقه ان شكلا مبقتش بنت
وانى بنت بس فالبطاقه !

انفجرت فالعياط فكلمتها الاخيرة ،شدها عليه ياسين باخر م فيه من قوة وخدها فاحضانه
وهو بيعيط برضو .
دموعه نزلت عالايس كاب الى هى لابساه تدارى م تبقى من شعر وفروة راس باينه،
دموعها وعياطها كأنها طفله صغيرة .

شبك صوابعه فصوابعها ورفع وشها ليه وقالها …

ياسين: انتى ياللى بتملكينى اوعى منى فيوم تروحى
انتى الى عايشه جوه عينى
انتى الى روحك سانده روحى
احتويكى وتحتوينى ..وباللى واجعك ليا بوحى ♡

يارا ابتسمت وعيونها مليانه دموع ووشها

ياسين: مينفعش اخد قوتى منك وتبقى عامله كده
مينفعش اعتبرك سندى وتبقى ضعيفه كده
انتى بتتعالجى ياقلب ياسين …يعنى العلاج له اثار جانبيه
بكرة وبعده تخفى وشعرك يطلع من تانى واحلى كمان

( ضمها لصدره) فاكرة شعرك الملون وانتى صغيرة ولما كبرتى رجع بنى
مش يمكن لما يطلع الجديد يبقى ملون زى زمان

يارا ابتسمت فحضنه ورفعت وشها له وهو ضاممها عليه

يارا: ياسين انا بحبك !

ياسين سمعها وطبع بوسه قوية دامت لثوانى شفايفه لامسه جبهتها وضم راسها عليه اوى

ياسين: وانا بموت فيكى يا حبيبة ياسين ( بص لعيونها بلهفه والدموع محلياهم) انا معاكى ومش هسيبك
مش عسيبك غير لو ربنا عايز كده

قاطعته يارا وحطت صوابعها ع شفايفه !

يارا: اوعى تقول كده تانى ، ان شاءالله هتخف وهتطلع وهتبقى احسن واحد فالدنيا

ياسين: هخف وانا مستعين بالله ثم عشانك يايارا ، خليكى اقوى
ومين قالك انك كده برغم شعرك الواقع وحواجبك ورموشك المختفيه انك مش بنت
انتى كده فعينى اغلى واجمل بنات الكون

يارا: لما ربنا كتب عليا يكون عندى مرض خطير ومعشش طبيعيه زى البنات
الى فسنى
اعيش فمستشفى ووسط تحاليل وجلسات وكيماوى
استقبلت ده برضا وسجدت لله
اتارى قلبي كان حاسس ان كل الحب والحنان الى اتحرمت طول عنرى منهم هلاقيهم
هنا

فتح كف ايدها وباس جواه بوسه هاديه ،اتكسفت وسحبت ايديها

ياسين: بصى لجمالك فالمرايه وانتى مكسوفه ، بنت فالبطاقه وبس ده ايه
انتى لو مش بنت يبقى مفيش بنات عالارض .

خالد فتح الباب مرة واحدة

خالد : انتو هنا وانا بدور عليكم ،يلا فى فيلم جديد جابوه هنشوفوا فقاعة العرض
يلا هيبدأ

يارا: حاضر ياخالود

ياسين: جايين …الافلام هتلحس دماغك

#نوتيلا
#لنورإسماعيل

‘·,’·,’·,’·,’·,’·,’·,’·,’·,’·,’·

بِسْمِ اللَّهِ الرَّحْمَنِ الرَّحِيمِ ()

الْحَمْدُ لِلَّهِ رَبِّ الْعَالَمِينَ () الرَّحْمَنِ الرَّحِيم َمالِكِ يَوْمِ الدِّينِ إِيَّاكَ نَعْبُدُ وَإِيَّاكَ نَسْتَعِينُ اهْدِنَا الصِّرَاطَ الْمُسْتَقِيمَ صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ

بعد م شالوا كفوف ايديهم من بعض ،قام والد آسيا يحضن إياد ولمى طلعت بأحلى زغرودة
تهز العمارة كلها

اهل إياد قاعدين كلهم جايين من كفر الشيخ بلدهم الاصلى ، وجماعة من اهل آسيا
وطبعا متوقع ال٦بنات ب يارا

بابا آسيا اتفق تكون فاتحه وبس من غير شبكة ولا دخول فتفاصيل لحد م تخلص
آخر ترم عندها وهو يوقف ع رجله اكتر من كده وياخد فرصته يكون جدير بيها

الفرحه مكانتش سيعاهم
إياد لابس بدلة محترمه وآسيا جابت فستان سواريه هادى وميكاب خفيف
وقعدت وسطهم

والحفلة مش هتمشى من غير رقص البنات سوا

لمى قومت إياد وآسيا يرقصوا ولفوا البنات حواليهم ع منازل لاصاله ..برضو !!

اصل لمى حلفت تشتغل لكل واحدة ففرحها

إياد رقص بفرحه مع اسيا والبنات بالتسقيفه حواليهم ، معزموش حد اهل اسيا
لان الموضوع عالضيق شوية
الجيران بس الى نزلوا يحضروا والشباب زى اخوات نشوى
وسفيان جه دقيقتين سلم ومشى
وانس!

لكن بالرغم من ان آسيا الى كانت العروسةالمرة دى لكن وجدان كانت منورة عنها
ومجهول السبب 😉

لمى : طبعا مش مصدق روحك من الفرحه

إياد: انا حاسس ان قلبي هيوقف اساسا

لمى: مبروووك يا عم

وجدان جت قعدت جمب اياد وبتوشوشه فودنه من صوت الاغانى

وجدان : مبروك ومع المبروك انذار من جهنم

إياد: ياساتر يارب سلام قول من رب رحيم

وجدان: اه يا حلوياااات

إياد: حلويات!!

وجدان: انت اخدت بونبوناية الشله ، برنسيسة الشله
حتة السوكر تزعلها تضايقها
هنحط السيخ المحمى فصرصور ودنك

جت قعدت مريم الناحية التانيه

مريم: ع فكرة اسيا اختى هاه ! اختى بجد اختى فالرضاعه
يعنى لو جت يوم تشتكى منك يا ويييلك ويا سواد ليلك

لمى(واقفه قصاده) هنجطعك جطيييييع

إياد بصوت يضحك خايف: الحقينى يا آسيااااااا

آسيا: ايه يابنات مالكم بيه

يارا: انتوا لحقتوا تتلموا عليه الله يهدكم

إياد: واحدة بتهددنى هتقطعنى وواحدة هتحط السيخ ابمحمى فصرصور ودنى

ايه يا اسيا دول انا حاسس انى وقعت فعصابه

وجدان: بص بالصلاه عالنبي ياريس ، الكابتن حضرة المقدم
سليم باشا ابن خالة البت دى
مسنينا شلة الشر
شوف انت لو حد داس ع ضلع من اضلاع الشله دى ممكن يحصله ايه

مريم( بتحول وشه ليها) اه وشوف بقى احنا الى اقنعناها تحبك
وتبقى معاك هى مكانتش طايقاك اصلا يعنى كل يوم تثبت ولاءك
ليها ولينا

لمى: وتقب بالى معاك وتمسح رجلك فالمشاية برة قبل م تدخل

إياد: انا جاى اتقلب مش اتجوز …يا اسيااااا

آسيا: انتو رخمين ع فكرة ،بس يابنات

نشوى : الله يخرب عقلكم هههههههه

تبارك : لازم التاتش ميعدوش حاجه من غيره ،دول شلة الشر

لمى : تعالو يابنات نشغل رقصة هادية خليهم يرقصوا سوا
دى الرقصة دى حكاية مقولكمش هييييح

وجدان ( بصالها باشمئزاز) هييييح! رقصتيها مع مين ياسعدية
شربتى بانجو ولا لسه يا سعدية

لمى: يلا يا اسيا يلا يا اياد قوموا هترقصوا سلو

آسيا: لا يابت اسكتى

إياد: طب استأذنى عمى الاول لو وافق تمام موافقش احنا كده كويسين

راحت لمى تاخد اذن باباها الى موافقش وقال بالحرف
فالزفاف ان شاءالله

كانت انس بيجر وجدان من دراعها من وسطهم

انس: اومال شغاله لوك لوك لوك فودن العريس اومال مش مالى
عينك يابت ولا ايه

وجدان: انت سخن يابابا ولا حاجه ؟ مالك

انس: مالى! والله عصبتينى

وجدان: انس انت عايزة ايه ؟

انس سكت واتلجلج

وجدان: مش فاهمة انت عايز توصل لايه بالظبط

انس( غير الموضوع) انتى مالك محلوة زيادة عن اللزوم
كده انهاردة

وجدان: ليه اول مرة تشوفنى ؟ مانا فخلقتك بقالى ٢٠سنه

انس سكت وحس انه بدا يبان عليه

وجدان: انت اول مرة تشوفنى يعنى ؟ انس
سكتك الى انت بتحبها
انا مبحبهاش
وطريقتك مش طريقتى
ولو عاوز تتسلى فالكافيهات والشوارع والنت مليانين
لكن انا …انا عزيزة اوى
عمرى م احط نفسي مطرح حبة لب فايدك
رايح وجاى ت أز أز فيهم …عن اذنك هروحلهم
اصل دى خطوبة آسيا
خطوبة ع واحد تعب واتمرمط لحد م وصلها
لازم كلنا نفرحلها ولا ايه

انس باصص لها وهو محرج لانها افحمته

انس: رشقتهملى كلمتين زى الصح فوشى انتى هاه ؟

( سابته ومشيت) ضيعتى لحظة بنت ستين كلب جاتك نيلة فشكلك اهلك معرفوش يربوكى

هتدوخينى انا عارف ..خدى يابت!!

#نور_اسماعيل

شاهد أيضاً

اعتراف بقلم نور حجازى شعر

أعتراف… أنا بعترف إن انت فعلاً ماختلفت واللي اختلف قلبي البرىء اصبح جبان ومش جريئ …

اترك رد