الرئيسية / الاخبار / رواية نوتيلا للكاتبه نور اسماعيل الحلقه العشرون

رواية نوتيلا للكاتبه نور اسماعيل الحلقه العشرون

الحلقه ٢٠

” بتهرجى واتجننتى ويومك مش باينله لون ”

مريم : ليه يعنى كنت عملت ايه

آسيا : يعنى احنا كلامنا ليكى والنصايح كله راح ع مفيش

وجدان : ده انا والغلبانة دى وحضرة الظابط حتى يارا بوقنا وجعنا
مازن حيوان يا مريم
متفكريش فيه تانى يا مريم
وفالاخر كأنك بتقوليلنا اولعوا انتوا بجاز ادينى رجعتلوا

آسيا: لا وايه الهانم الى راحت كلمته ،وبتستسمحه انه يفضل وياها

مريم : كفاياكم تقطيم فيا بقى ، لما كنت بقعد ف اوضتى بعيط
وحدى محدش كان حاسس
اهم حاجه عندكم انى اكون قوية وفراق مازن ميهزمنيش
كل ده تمثيل لانى مقدرش
حاولت كتير وفالاخر تعبت…تعبت من غيره اوى

آسيا ووجدان بصوا لبعض بصة مستائين ع حال مريم

آسيا( بطريقه حنونه ) احنا مكناش حاسين بيكى يا مريم ؟!

مريم : ايوة ، حتى لو بتواسونى وجمبي فبليل بيكون معاكى اياد
وهى بيبقى معاها …

وجدان ( قاطعتها) معايا مين !

مريم : معاكى الى معاكى بقى وانا لوحدى

آسيا: بتسمى حبنا ليكى وخوفنا عليكى واننا دايما جمبك انك لوحدك
يا مريم !
كفاية حنية خالتك وقلق سليم عليكى وخوف انس
مش هقولك احنا
دول عندك بالدنيا

مريم : انا مرتاحه كده وراحتى مع مازن وهو قالى انه هيحاول
يتقدملى تانى

وجدان ( بصت ل آسيا وعوجت بوقها) موت ياحمار !!!
, ‘·,’·,’·,’·,’·,’·,’·,’·,’·,’·,’·

بعد جلسة كيماوى ل ياسين … وهى عبارة عن كبسولات
بياخدها عن طريق الفم

يارا قاعدة جمبه زى م هو بيقعد ،لان هى مرت بآثارها الجانبيه
غثيان وقئ وارهاق ودوخه شديدة
طقم التمريض بيعمل ع راحتهم لانها مستشفى خاص ، بس كون يكون
فى حد جمبك من غير واجب زى التمريض ،ده شئ يرفع من الروح المعنوية
فحد ذاته !

اخد الكيماوى وقاعد مع يارا يتكلم عشان ينسي الالم …

ياسين ( بارهاق بيتكلم) بيقولك ان كل م اثار الكيماوى الجانبيه تبقى
شديدة كل م نعرف انه مفعولة كويس

يارا: متتعبش نفسك بالكلام ،استريح

ياسين: بالعكس …الكلام بينسينى الالم ،خلينى اتكلم معاكى شوية
بحب اتكلم معاكى اوى

يارا: خلاص الى يريحك

ياسين : عارفه ….من خمس سنين انا مكنتش كده
كنت سهر وخروج وشرب
وبنات

يارا: شرب وبنات ! ( باستغراب)

ياسين ( بيضحك باعياء) اه ….متستغربيش ، الكائن الى قدامك دلوقت
مش هو الى كان قبل كده
كنت واخد الدنيا بالطول والعرض ،بعمل كل الى فمزاجى والى عايز اعمله
عايش حياتى اوى

يارا: وبعدين

ياسين: ( سرح ) سافرت كل حته جوه مصر ، حفلات وعملت
مكنتش بقعد فالبيت يومين ع بعض
صاحبت بنات كتير
لحد م فيوم …حبيت بنت
حبيتها بجد
مكانتش واحدة من الى صاحبتهم ، كنت ماشى بعربية صاحبى
وشاربين وعاملين دماغ وكانت هى معديه
كنا هنخبطها
راحت قالت ربنا اداكم نعمه متدوسوش بيها عالناس

الكلمة وقفتنى !
رجعتلها واعتذرت بس هى معبرتنيش ومشيت
فضلت حافظ ملامحها والمكان الى شوفتها فيه
بقيت مستقر هناك ليل ونهار ع …ع امل انى اشوفها( بيتألم)

يارا( بشغف) وشوفتها؟

ياسين: اه ..حاولت اشوفها بتعمل ايه فيومها بقيت امشى وراها
حاولت كتير اتعرف عليها،سألت عنها
من غير م تاخد بالها لاقيتها بتعمل حجات كتييير كويسه لله
وبتعلم بنات ففصول محو الاميه ببلاش
فضولى موتنى انى اعرفها ،ايه الشخص الملائكى ده

دى مبتغلطش غلطه واحدة !
وقفتها فمرة فالشارع قولتلها انا معجب بيكى
قالتلى بيتنا مفتوح لكن متوقفنيش فالشارع كده ،عيب مترضهاش لاختك
وسابتنى وهى حتى متعرفنيش ولا فاكرانى

ظبطت يوم ع انى اروحلها واتقدم وجت كام حاجه عطلتنى
لحد م جه اليوم المناسب وبسال عن رقم باباها احدد ميعاد
لاقيت فى عزا فشارعهم ( عيونه دمعت) قالولى انها هى
ماتت فحادثه

يارا( عيونها دمعت) لا حول ولا قوة الا بالله،ربنا يرحمها
طب وانت عملت ايه

ياسين: انا متعلقتش بيها ع اد م اتعلقت هى كانت ازاى قريبة من ربنا
كده ومؤدبه كده وخلاص ماتت
وانا الى مقضيها مش عامل حساب لليوم ده
ولا فاكره
كانت السبب انى اتوب عن حجات كتير
وبطلت حجات كتير
وبعدها بفترة بدأ تعبي ،الدكاترة الاول قالوا كليه وبعدين قالوا
تعب فالمثانه
وبعدين قالوا لا دى حصوات
عملت تحاليل كتيييير واشعات وفالاخر دكتور شاطر اكتشف انه
ورم فالقاولون
حمدت ربنا اوى لما عرفت ،حسيت ان ربنا بينقينى من باقى ذنوبي
وبيخلصنى من عيوبي

يارا: فعلا ربنا قال فحديثه القدسي (( إني والإنس والجن في نبأ عظيم، أخلق ويعبد غيري، وأرزق ويشكر سواي، خيري إلى العباد نازل، وشرهم إليّ صاعد، أتحبب إليهم بنعمي وأنا الغني عنهم، ويتبغضون إلي بالمعاصي وهم أفقر شيء إليّ، من أقبل عليّ منهم تلقيته من بعيد، ومن أعرض عني منهم ناديته من قريب، أهل ذكري، أهل مودتي، أهل شكري، أهل زيادتي، أهل معصيتي لا أقنطهم من رحمتي، إن تابوا فأنا حبيبهم، وإن لم يتوبوا فأنا طبيبهم، أبتليهم بالمصائب لأطهرهم من الذنوب والمعايب، الحسنة عندي بعشرة أمثالها وأزيد والسيئة بمثلها وأعفو، وأنا أرأف بعبدي من الأم بولدها ))

ياسين: ماشاء الله عليكى يا يارا ،ثقافتك الدينيه واسعه

يارا: بابا بصراحه بيقرا فكتب الدين كتير وكان بيجبلنا كتب
نعرف اكتر ونتثقف عن ديننا وانا كنت حابه ده اوى

ياسين ( بدأ يحس باحساس القئ) ااه

يارا( اتخضت ) مالك ! حاسس بتعب

ياسين: ( قايم من عالسرير) هروح الحمام

يارا( سندته وسند عليها ) تعالى انا جاية معاك

اخدته يارا للحمام وفضلت سانداه لحد م خلص ومن كتر الارهاق
كان بيمشى بالعافيه

ودته لاوضته وسريره بمساعدة واحدة من الممرضات

يارا ( واقفه جمبه) سلامتك يا ياسين ،ان شاء الله بالشفا

الممرضة : لا ده هو شادد حيله عن كل مرة بعد الكيماوى
يمكن فى تغيير المرة دى ( طبطبت ع يارا وابتسمت ومشيت)

يارا: فايق ولا تعبان

ياسين ( ابتسم بالعافيه) كويس الحمدلله

يارا: طب استنانى ٥دقايق

خرجت من الاوضه جابت ورقه فايدها ودخلت

يارا: بص

فتح الورقه بالراحه لاقاها راسمه بنت بنص وش والنص التانى متدارى

ياسين: حلو اوى اوى يا يارا ، بس فين باقى وشها

يارا: ( اتأثرت) لسه روحها مكملتش ،فوشها بالنسبة لى مش باين

ياسين ( باصصلها ومبتسم) ان شاءالله تيجى الحاجه الى تكمله

يارا: ( ابتسمت) يارب ♡

#نوتيلا
#لنورإسماعيل

, ‘·,’·,’·,’·,’·,’·,’·,’·,’·,’·,’·

عدى شهرين ..
يارا وياسين ومساندتهم لبعض قربتهم اكتر وبدأت شقشقه حجات
اما عن غلاسة انس ع وجدان فهى لا تنقطع وزادت وكل م يزيد وجدان تديله فوق دماغه
لمى لسه طايشه فحبها لاحمد ،واحمد يوم معاها وفرحان ويوم لاسرته
ومش فاكرها …وهى راضيه .
لكن نشوى فهى بدأت تميل ل حسام ،بس بترجع تلوم نفسها انها متدلوش
وش اكتر من كده وترجع للخشب تانى …بس بقت مبتعرفش ! وبقى
باين عليها
حتى حسام الفضول انحول لاهتمام والمناقرة اتحولت لفضفضه
وقعدات طويييلة من الحكاوى سوا فالمكتب.

اسيا واياد بقى …
العاقلين الموزونين بتوعنا ،زى م هما مكالمة كل فترة يتكمنوا ع بعض
ويبلغوا بعض بتقاريرهم واخر اخبارهم
وخلاص
وفالصلاه …دعواتهم لبعض ربنا يجمعهم ع خير ..

عمرو خطيب تبارك قرب ينزل عشان الشبكة وكتب الكتاب وده موتر تبارك
جدا ومش عارفه ايه السبب
حتى بعد مساعدته لاخوها سفيان حاسه ان لسه فيه حاجز بينهم

وع سيرة سفيان …فهو حاليا بيشتغل فمحل ملابس محجبات ومنقبات
بيع عبايات وخلافه .
المحل بتاع واحد صاحبه ولما عرف بظروفه شغله معاه ..

العروسين ندى وسليم ،قرب ميعاد جوازهم
وبيحضروا له ،بعد م الشقه اتشطبت ع احدث تشطيب
وخلصت والموبيليا خلصت وجت مفاضلش الا الرفايع
وتحديد ميعاد الفرح.

ومش هننسي ابدا مريم ومازن ،بعد رجوعهم من تانى لبعض
فمازن مبقاش بنفس اهتمامه ولهفته الاولانيه لمريم
لكن هى مستحمله وبتحبه كده
خصوصا بعد مناقشته للماچيستير ونجاحه فيه ،بدأ يستعد للدكتوراه
ومفيش فباله غير كده …يعنى مفيش فباله انه يروح يتقدم
لمريم تانى مثلا !

فمكالمة مابينهم …

مريم : قولى يا مازن مين فينا بيحب التانى اكتر ؟
مازن : هههههه اهو شغل البنات الفاضى انا مبحبوش

مريم : متبقاش رخم عشان خاطرى بقى
مازن : ممممم انتى يا حبيبتى بتحبينى اكتر

مريم: ياسلام ! وليه ميبقاش انت
مازن: خلاص ياستى انا ولا تزعلى

مريم: لا مش زعلانه ،وفيها ايه لما احبك واموت فيك اكتر منك
تحب اقولهالك بصوت عالى كمان
اهو بحبااااك يا ماااازن

دخل انس من غير استئذان كالعادة !

مريم اتلخبطت ونزلت الفون من ع ودنها ،انس عيونه مبرئة وشكله
ع اخره

انس: ( بطريقه تخوف) بتكلمى مين ؟
مريم : هاه !! ده ده ( خايفه)

انس( جرى عليها واخد الفون منها وقرا الاسم) الله عليكى وع حلاوتك
مازن !
وبتقوليله بحباااااك

مريم ( بخوف) لا مقولتش بحبك!

انس: انا سامعك بودانى انتى هتكدبي ،هاتى التليفون ده م انتيش ماسكاه تانى ( مسكها من كتفها وضربها بالقلم
وشدها من عالسرير)

مريم: حرام عليك يا انس سيبنى ( بتصرخ من ضربه فيها)

سليم كان ف سابع نومه من التعب والارهاق الى بيشوفه اليوم كله
ومش حاسس بحاجه
بس لما صرخت قام منفوض عالسرير!
ركز فالصوت …فعلا مريم
قام فتلات خطوات من سريره للارض لاوضه مريم

سليم ( دخل جرى خلصها من ايد انس) فيه ايه !
انس: اسأل الهانم الى مستغفلانا وملبسانا عمم ،نايمين احنا جوه
وهى هنا بتتسهوك مع المعيد بتاعها

مريم ( معيطه ومضروبه) انا مبتسهوكش ،عالاقل احسن منك
هو جه واتقدملى لكن انت بتلعب ببنات الناس

انس( بيحاول ياخدها من حضن سليم ) يابت متستفزنيش ! جه فين
يابت لما خلع ومجاش تانى
ايه قلة الربايه الى انتى فيها دى

سليم: بس يا انس بسسس( بيبعد انس ورا )
مريم بجد كلمتى مازن ؟

انس: لا وشغاله بحبك ومش بحبك ،احنا دلعناكى بزيادة
والله لاربيكى

سليم( بيزق انس لورا) بس يا انس كفايه ! ردى يا مريم بجد ده

مريم ( بخجل من سليم بصت فالارض ومنطقتش)

سليم اتفاجئ واتضايق اوى

سليم( بحدة ) احنا مش اتكلمنا فيه الموضوع ده ! ردى ( بعصبيه)

مريم : ايوة بس هو لسه بيحبنى وهييجى يتقدملى تانى

انس( عايز يطولها من سليم ) محدش بيتجوز واحدة مشى معاها !
ايه السذاجه دى هتجيبلنا مصيبه والله لاموتك

مريم ( بصوت عالى وهى معيطه) انا مش هجيب مصيبه لحد
الدور والباقى ع الى بيحب فحبيبة صاحبه
وخاين ومقضيها ،لكن ييجى عند اخته يعمل فيها الشريف
ويفش فيها غلبه !

هنا انس انفعاله عماه وقدر يطولها ورزعها قلم جامد طوح براسها
ع شباك سريرها اتخبطت !
دماغها اتفتخت واغمى عليها …

سليم( نزل عالارض يشوفها) الله يخربيتك عملت ايه …مريم يا مريم
البت مبتنطقش!

انس: ان شاءالله تكون ماتت عشان نخلص

سليم: ( بصوت عالى) التصرف مش بالهمجيه دى ياحمار انت ،انزل هات تاكس
نوديها المستشفى….اتحرك يا انس !

خالتها صحيت عالصوت واتخضت ع منظر مريم والدم بتنزفه من راسها
ومغمى عليها

انس شالها ونزل بيها ومعاه سليم مخضوض اوى عليها.

ع اقرب مستشفى ودوها ، الدكاترة النوباتشية فوقوها
وقالوا ان الجرح تلزمه خياطه …خيطت غرزتين ولفت راسها
من غير بنج وكانت بتموت من الالم وماسكه ايد سليم
وانس حاسس بالذنب وبيشرب سيجارة برة وبيقطع فيه صوت
صريخها من الخياطه .

طبعا ام سايم كل ١٠ دقايق تتصل تطمن قلقانه ،اما عن مازن
فهو اول م سمع بداية الخناقه وقفل السكه والفون خااالص !

اخدوها وروحوا البيت …

كانت فايقه ،انس مرجعش معاهم
احساس بالذنب وفنفس الوقت متضايق منها

سليم : هقول لماما تحضرلك حاجه تفطريها ، اشربي العصيرده
كويس عشان الدم الى نزلتيه

مريم ( مسكت ايده ) انت زعلان منى ؟

سليم( فك ايده عنها وهو متضايق) خونتى ثقتى فيكى للمرة التانيه
معنديش كلام اقوله لك يا مريم
من هنا ورايح …انتى حره
بس ملكيش كلام معايا نهائى

سابها وخرج وهى اتفتحت فالعياط …خليط م بين ان كلام سليم وجعها
وضرب انس وكلامه برضو
وخوفها من الى جاى مع مازن
ربنا يستر ….

, ‘·,’·,’·,’·,’·,’·,’·,’·,’·,’·,’·

سعدية بنت البواب كانت اول واحدة تشوف عمرو بعد م رجع من السفر
حتى قبل خطيبته وقرايبه …

سعدية : ايوة حضرتك داخل لمين ؟

عمرو : داخل لمنزل عمى ابراهيم …ابو سفيان

سعدية بتلف حواليه وجابته من فوق لتحت

سعدية : امور ومسبسب وشعرك متساوى ولبسك نضيف وريحتك حلوة
انت قريبهم بجد!

عمرو : هو انا ممكن ادخل ،انتى امن هنا ولا ايه

سعدية: استنى ! انت خطيب الانسة توبارك
يا ماشاء الله راجل ملو هدومه …فيها ايه الشنط دى

عمرو ضحك وسابها ودخل

سعدية: لو جايب لوز وفسدق من بتاع الخليج ابقى ابعتلنا نصيبنا يا دكتور الله يخليك

عمرو بيردد مع نفسه وهو بيرن جرس الشقه
عمرو ” دكتور! ههههههه

فتحت تبارك …لاقته عمرو ،عمرو عرف بالبديهى انها تبارك حتى بالنقاب

تبارك : عمرو ! حمدلله عالسلامة …ادخل

عمرو: ازيك يا تبارك …

دخل الشقه

تبارك: مقولتش انك جاى

عمرو : حبيت اعملهالك مفجأة ونبهت عليهم فالبيت محدش يقولك
لسه واصل من يومين

خرجت مامتها واتفجأت بعمرو اوى وفرحت

الام: عموره يا حبيبي حمدلله ع سلامتك ( بتحضنه) لا انا زى ماما
انا هبوسك

عمرو( مميل بتبوسه) طبعا يا مرات عمى انتى امى التانيه

الام: الله اكبر ياعمرو …الله اكبر عليك يا حبيبي
زدت حلاوة ع حلاوتك

استنى ادخل اقول لعمك ده هيفرح اوى

دخل قعد فالصالون ودخلت وراه تبارك

تبارك : تشرب ايه ياعمرو ؟

عمرو : اشرب ايه بس تعالى انا مش عايز اشرب،تعالى اقعدى قدامى
وبس

مامتها جابت بابا تبارك ع كرسيه المتحرك بتزوقه ودخلته،قام عمرو
وسلم عليه وحضنه وباس ايده

الاب: يا حبيبي حمدلله ع سلامتك يابنى ،الف حمدلله عالسلامه
مش تقول انك نازل

عمرو ( باصص ناحية تبارك ) حبيت اعملها مفجأة

الاب: مفجأة زى العسل يا عمرو والله ، هاه عندكم ايه للغدا يا ام سفيان
عايزين وليمة
اكيد بطنه ناشفه من اكل العزاب لوحده هناك

عمرو : والله م عايز حاجه انا عايز بس تيجوا تقعدوا اشبع منكم وحشتونى
،اكيد سفيان فشغله

الام: اه والله بيطلع من طالعة النهار بييجى الساعه ١١بليل هلكان ومش شايف قدامه

عمرو : ربنا يكون فعونه يارب

الام : ثوانى وهبعت سعدية تجيب الخضار واللحمه للغدا
نورتنا يا عمرو

عمرو : والله م تتعبوا نفسكم يا مرات عمى ،بص لتبارك) عاملة ايه يا تبارك

تبارك: الحمدلله والشكر

عمرو : يدوم حمدك فالخير يارب …( بصوت واطى ناحيتها) النقاب
زادك حلاوة

تبارك اتكسفت وبصت بعيد

الاب: الا مجاش ابوك معاك ولا اخواتك

عمرو ( انتبه) هاه ! لا نازلين عالشبكة ان شاءالله

الاب: ومين عارف انك جاى

عمرو: كلهم عارفين .. بس انا نبهت عليهم ميقولوش ليكم

الاب: حمدلله ع سلامتك يابنى ، طيب البيت بيتك يا حبيبي
هروح اتوضى لصلاة الضهر

مشى بكرسيه

تبارك : طيب استأذنك هروح اصلى الضهر

عمرو ( مسك ايدها من فوق الجونتى ) الضهر ممتد للعصر يا تبارك
اقعدى اشبع منك شوية

تبارك : لا مينفعش الصلاه اولى ،وبعدين عشان اساعد ماما فالغدا

عمرو: انا مش عايز غدا انا عايزك تقعدى قدامى وخلاص حتى لو مش شايف منك غير عنيكى
والله وحشانى

تبارك: تانى !

عمرو: شوية عشان خاطرى

تبارك : مش هينفع ياعمرو

عمرو: طب خمس دقايق

تبارك : لا برضو

عمرو: طب نص ساعة !

ضحكت وبان صوت ضحكتها من تحت النقاب وقامت من الاوضه
وهو متابعها بالنظر مبتسم .

#نوتيلا
#لنورإسماعيل

, ‘·,’·,’·,’·,’·,’·,’·,’·,’·,’·,’·

آسيا ولمى ونشوى عند يارا بيزوروها …

آسيا: ضربها ومبتطلعش من البيت ودماغها اتفتحت

يارا: يعنى ده عقاب من انس ولا ايه

لمى : لا اخد الموبايل منها بس ،لكن هى مبتنزلش عشان الجرح
وكمان عشان متشوفش مازن مكسوفه من الى حصل

مريم: معرفش مريم ليها دماغ لوحدها ،الى عملته غلط وكمان اخوها قفشها
وبتبجح فيه تستحمل بقى

يارا: بس بالراحه مش كده ليه عمل كده انس

آسيا: هى الى مبتسمعش الكلام ومازن ده مش بييجى من وراه غير المصايب

( موبايلها رن ) ايه ده ! اياد
مش عادته

لمى : شوفيه

آسيا: الو يا اياد …ازيك

اياد : الحقينى يا اسيا !!!

, ‘·,’·,’·,’·,’·,’·,’·,’·,’·,’·,’·

فمحل الملابس بتاعه واقف والدم هينط من نافوخه من الغيظ ،والبنت
الى شغاله فالمحل قاعدة وخايفه منه

اياد : الست هانم الى مشغلها ومستأمنها عالبضاعه والمحل بالنهار
واقفه عاملة المحل كازينو العشاق وبتقابل حبيبها هنا
وبيدخل يقضيها معاها فالبروفات وتسيب هى هنا البضاعه
بالدرج ولا حد سائل

البنت الشغاله( بخوف) والله يا استاذ اياد انت ظالمنى ،انا كنت فالحمام

اياد ( بعصبيه ) متكدبيش! كاميرات الى قدام محل الجواهرجى الى قدامنا
مصورين الحيوان الى بييجى لك هنا وهو داخل ومصورة العيال الشراشيح
الحراميه وهما داخلين وهما خارجين بالبضاعه والفلوس

آسيا: طيب الكاميرا جايبه وشوشهم ؟

اياد : للاسف لا ،جايباهم من بعيد

آسيا: طيب اهدى طيب

اياد : اهدى ايه يا اسيا !! اتخرب بيتى وبيت صاحبي
المحل فاضى
حتى الشماعات خدوها
والدرج فاضى
( قرب عالبت الى بتشتغل وهى خافت منه ووقفت ورا اسيا) قوليلى اعمل
فيكى ايه ؟
اتصرف معاكى ازاى
انا مش راضى لحد دلوقتي امد ايدى عليكى وبقول مهما كنتى ف انتى بنتطانتى لو دكر قدامى كنت ساوتك بارض المحل

آسيا: خلاص يا اياد الى حصل حصل فكر بالعقل ، هتعمل جناية يعنى
هتلبس نفسك مصيبه جديدة
( بتقول للبنت) خلاص امشى انتى روحى لحالك …الله يسامحك ياشيخه

اياد: مشيتها ليه يا اسيا

آسيا: يعنى هنعملها ايه ي اياد …اهدى طيب

إياد : انا لا عارف المها من هنا ولا من هنا ولا اعمل ايه …( قعد عالارض وحط ايده
ع راسه)

آسيا: ياريتنى فايدى اساعدك ( بتطبطب عليه)

إياد( رفع راسه ليها) ليه كل م اقول حلمنا قرب بتصعب ي اسيا

اسيا: معلش وعسي ان تكرهوا شيئا وهو خير لكم
متعرفش ربنا عمل ليه كده

اياد( ضم ايده ع بعض وحطهم قدام بوقه يفكر) عارفه احنا كده خسرنا
بضاعه بكام
وكان فى كام فالدرج

آسيا: وانت مش حاطط ليه كاميرات واجهزة انذار فاللبس زى المحلات الكبيرة

اياد: يا آسيا انا فاتح فمنطقه الساعة ،عارفه يعنى ايه الساعه
يعنى خالتى وعمتك والناس الغلابه دول
هعملهم كاميرات واجهزة انذار تتكلف بتمن المحل كله

آسيا: طيب خلاص …الى حصل حصل فكر ف اى حل بدل م تتعب
من الضيقه دى

اياد: مفيش فدماغى اى حلول …مقداميش غير انى اقول يارب

آسيا: يارب اقف معاه يارب ( طقت فدماغها فكرة) طيب بص
انا شايله دهبي من وانا صغيرة لحد دلوقتي
يعنى مش بطالين،والبت لمى معاها وهى مش هتمانع تساعدك
والموبايل بتاعى ده بابا جابهولى ب ٣الاآف جنيه
خدهم وبيعهم وهات بتمنهم بضاعه وياسيدى من الارباح رجعلى الفلوس

إياد بصلها ب ازدراء

آسيا: ايه

إياد: اخر مرة اسمعك بتجيبي سيرة حاجه من حاجاتك
او انك تعرضى عليا فلوسك
انا ازودهم مخدش منك

اسيا: ياعم ابقى رجعهم

اياد: اقفلى عالموضوع ي اسيا ، انا اتشقلب واضرب الارض
وماخدش منك مليم
اسكتى بقى

آسيا ابتسمت وطبطبت عليه تهون وهو بيفكر …

, ‘·,’·,’·,’·,’·,’·,’·,’·,’·,’·,’·

آخر حاجه كانت ناقصاهم تروح ع شقتهم ،كانت أوضة الاطفال
وندى صممت متخترهاش لوحدها زى م سليم سابلها احقية الاختيار
فموبيليا البيت كله
اولا لانه مشغول طول الوقت
ثانيا لان هى العروسة والبنات ذوقهم ارقى واشيك

طلبت منه يروح معاها انهاردة يتفرجوا ع تصميمات غرف نوم الاطفال
سوا ويختاروها عشان تروح عالشقه،ويتفقوا ع ميعاد الفرح .

ندى : دى احلى مش كده

سليم: لا بصراحه الى شوفناها الاول كانت ارق واجمل

ندى : اااه الى هى السرير ع شكل بترافلاى بينك ! طب دى بناتى
ياحبيبي لكن دى تناسب النوعين بناتى وولادى

سليم: ماهو انا بحب البنات ،فحاسس ان اول مولود لينا هيكون بنت
ان شاءالله

ندى ( بتدلع ومسكته من ياقته) ونسميها ايه

سليم: ممممم ، اسم حفصه وحور طالع موضه عاجبنى اوى

ندى : مممم تصور حور اجمل ،حور سليم محمود وجيه
خلاص تبقى حور
ولو ولد

سليم: لا الولد سميه انتى مش فبالى حاجه له

ندى: ولا انا …ساعتها نبقى نفكر ههههه

سليم: ع رأيك بلاش نسبق الاحداث

ندى: خلاص بلاش دى ولا نشوف غيرها

صاحب المعرض: اتفضل ياباشا ،هوريك فالدور الى فوق تصميمات لسه خلصانه
واول مرة تنزل السوق
ده انتوا توصية من سعادة اللواء لازم نتوصى بيكم

ندى : ميرسي

طلعوا يتفرجوا ،واتفقوا ع واحدة وفعلا خلاص سليم هيدفع فلوسها
وهتتشحن ع شقتهم

ندى: هتيجى معايا عالفيلا بقى تتكلم مع بابى ع ميعاد الفرح

سليم : معلش ياندى خليها بكرة ،مرهق اوى

ندى : يوووه ياسليم ، بالعربية بسرعه نوصل
دى حتى مامى مستنياك عالعشا وهتزعل لو مجتش

سليم ( ابتسم) ماشى لازم تغلبينى .. صحفيه طبعا الكلام لعبتك

ندى : وصحفيه شاطرة من فضلك هههههه

سليم: اكيد شاطرة والا مكونتيش وقعتينى من اول جرة قلم

ندى : ههههههههه

فالطريق لفيلا اللواء بابا ندى كان فى شوية مناكفات بينهم،ودلع من سليم عليه
وبرغم من انه فعلا مرهق وتعبان بس لبي رغبتها انه يقابل باباها انهاردة
ويتفقوا ع كل حاجه

اللواء: تشرب ايه ياسليم

سليم: متشكر سيادتك

اللواء: يابنى بطل سيادتك دى احنا خلاص بقينا اهل ( بيقول للخدامه)
اعملى ٢قهوة سكر زيادة

ندى : بابى …اخترنا اوضة للبيبي واو

جت مامتها

الام: منورنا ياسليم ، ان شاءالله تملوها بيبهات

ندى : ان شاءالله يا مامى

الاب،: ها يا سليم …الوقت المناسب للفرح وكمان اجازة شهر العسل
بالنسبة لك امتى

ندى : بابى لو سمحت اتوسط انه يزودوا شهر العسل لاكتر من اسبوعين
احنا هنسافر كذا حته

اللواء: مينفعش يسيب الشغل والداخليه اكتر من اسبوعين
ده شغل مينفعش يتعطل

ندى: يابابى انت لوا ..اتصرف

الام: خلاص بقى يا ندى خلى بابا يتكلم

سليم: انا شايف انه هيبقى مناسب معايا ،اجازة نص السنه
يعنى معظم ولاد قرايبي من العيلة فمدارس وجامعه
عشان يحضروا
وبالمرة مش هيكون وقت اعياد او مناسبات عشان منخافش من اللبش
ومتعطلش اجازتى اى حاجه

ندى ( قامت ع حيلها متضايقه) نعم !!!
اجازة ايه …لسه هنستنى شهرين كمان
ليه ياسليم م كل حاجه خلصت

سليم فضل باصص لها بغضب وموجه نظره عليها وقال بحده

سليم: انا قولت اسبابي فاختيار الوقت ده

ندى : لا بقى مش عشان كل الى قولته ده …عشان الست مريم تكون
خدت اجازتها وفاضيه
وبالمرة تكون عدت محنتها ع خير

الام( بزعيق) بنت !!

ندى : الا صحيح عرفت تيجى انهارده تنقى معايا الاوضه، انا سمعت
انها عيانه يا حرام
مقعدتش جمبها تعمل دادة ودكتور ليه يا سيادة المقدم

سليم اتضايق جدا ،حتى باباها ومامتها اتضايقوا من اسلوبها

قام سليم ووقف قصادها

سليم( اتنهد) من فترة قولتلك متتكلميش معايا بالطريقه دى
لكن كررتيها يا ندى
وقدام والدك ووالدتك

( بص للواء) انا اسف يا سيادة اللواء …بنت حضرتك مصغره عقلها
ع حجات تافهه
واصبح ده بيقلقنى اكتر من لازم ، مش هاممها بيتنا واستقرارنا
ع اد م هى مهتمه انى اتخلص من اهتمامى بعيلتى واتفرغ ليها وبس

ندى ( بزعيق) عيلتك ولا الست الهانم مريم !

سليم: وحتى تصرفك ده دلوقتى اثبتلى انك متنفعيش ف اى حاجه
واساءت الاختيار للاسف
لولا معزة والدك وانى فبيتكم …كنت رديت رد تانى خالص

اللواء: اقعد ياسليم معلش ،ندى اسكتى خالص

ندى: مش هسكت يابابى اما اشوف هيرد عليا ب ايه حضرة المقدم

سليم( بص للواء) اسف كمان مرة ( بص لمامتها) اسف ليكى انتى كمان
ردى اهو يا ندى

قلع دبلته وفتح ايدها وقفل عليها …ولبس الكاب ومشى !!

#نور_اسماعيل

شاهد أيضاً

أنا أحتضر للكاتبة نوال مسعود خاطرة

انا أحتضر سلام أيها البحر الأسود. سلام لما تحمله موجاتك من رسالةالمستبد القاضي .اجئت تخبرني …

اترك رد

error: Content is protected !!